MANAU LABAU

KNET February 12, 2004

Miwa Gumsan Mungdan Wunpawng Jinghpaw Myusha ni a manau poi hpe mungkan kaw e masha hkying mun mai manau ai poi gaba nga shagrau shingrai shaning shagu na Hkru Ta praw 15 ya shani poi gaba ndai galaw ai.

Moi shawng de manau ngu ai gaw jan ga e she manau ma ai da, shing gyim masha ni garai nchye dum ai, dai ten hta mungkan ting nga mi nga pra mi pra masha hte maren ga chye shaga, shada ga naw mai hkrum, lani mi a kajawng sha lamu e jan jahku sa pru htan nna, nga mi nga pra mi pra hpe wan hta htang gade gahtet ai jan jahku e lam jahkat nga sai da, Ji woi Jiwa ni yu n-la nna nga mi nga pra mi pra hpe hkye la lu na matu, Hkawng Rang U hte U Tawng hpe jan Hkawhkam nga ai ga de shangun masai da.

Jan Hkawhkam wa hpe lani mi jan langai sha pru na hku wa hpyi shawn, Hkawngrang U hte U Tawng gade pu ba jam jau nhtawm teng sha wa jan Hkawhkam lu tsun pyi shawn sai majaw dai shaloi njang jan masat shayawm kau sai da, dai hta n-ga jan Hkawhkam wa Hkawngrang U hte U Tawng hpe tsawra myit hte naw hkam hkalum la jan manau lawm da na hku mung nhkum jahkrat dawn, ndai gaw mawmui kaw tsun hkai ma ai “Ja shang but ga” manau nga ai dai rai sai.
Hkawngrang U hte U Tawng jan manau lawm da nna madu nga shara de bai nhtang du wa yang Ginding aga ting tsit lali tsawm nga la sai, lani mi Hkawngrang U Tawng rau sha lagat hpun kaba langai kaw lagat si sa jawm di sha ai, di sha magang manawt ka mayu ai myit ningtsing rawng wa magang, shingrai grip grip yin yin na amyu myu u ni hpe shaga gahkyin nhtawm lagat hpun na laya kaw manau woi nau ai, ndai hpe maumui hta tsun hkai nga ai gaw “Hkawng Shen Hku” U manau nga mying shamying ma ai, U manau dum ai shiga “Jai Hku Majoi” kaw nga shanu ai “Sut Wa Matu” hte shi a gai nu jan “Kungdung Tu Hkra” a na e na lu sai, tsun mayang shan yan gaw Wunpawng Jinghpaw Jiwoi Jiwa prat hta nachying share shagan kung zet dik ai da.

Mungkan e shan yu yang nchye ai nnga, sharin yang mung nchye ai nnga, shan U manau shara du ai hte La wa gaw manau ganing de manau ai lam sharin, Num jan gaw U Tawng mun hpe yu nna palawng galaw na matu sumla soi tawn (ya Wunpawng shayi ni hpun ai gumhpraw palawng gaw U Tawng hpe yu la nna galaw hpun ai re nga mung tsun ma ai) Dai “Sut Wa Matu” hte “Kung Dung Tu Hkra” Jai Hku Majoi kaw du wa ai hte Chyurum Wunpawng Amyu Sha yawng hpe manau poi gaba woi hpaw ma ai da, dai hpe maumui hta “Shinggyim” manau nga nna hkai ma ai.

Ndai labau maumui hpe moi ga naw hkrum ai ngu ai prat hta Amyu myu U ni Jiwoi Jiwa ni hpe ma ma tsun dan tawn nna dai ni du hkra Madai Nat, Jan Nat Wunpawng Amyu Sha ni kam sham lam hta grau gaba dik ai nat hpe ra hkungga, Jan hpe hkungga shagrau, dai majaw manau poi hpaw na shawng e madai nat hpe naw shawng atsawm hkungga masat kau nga ai da.
Jan manau, shyinggyim masha nga ai ga kaw du ai shani kaw nna Wunpawng Jinghpaw Amyu Sha ni gaw prat hte prat mi nai tsun hkai nhtawm, ya shaning shagu Chyurum Wunpawng sha ni Chyurum masat shamying ai poi gaba nan rai nga sai.

Hkawn

N Shawn Ginwang Htunghking Rapdaw

Nhtoi 2005 ning February praw 10 ya

* Ndai ntsa na labau gaw Miwa Gumsan Mungdan hta shanu nga ai Jinghpaw Wunpawng Amyu ni a hkai hkrat wa ai Manau Labau rai nga ai.