GA NMU YANG LAMU MU.

Moi shawng de, grai matsan nna, kasha mung shi lu ai matsan dinghku langai mi nga ai da oi.

Dai dinghku hta kasha mung shi lu ma ai da. Kade daram matsan ai nga yang sha na n-gu tum mi pyi nlu hkra matsan ma ai da. Kanu gaw kasha ni kawsi ai hpe yu nna grai matsan dum dik ai majaw, di hta nlung bang shadu tawn n htawm, shat shadu ai re garai n hkut shi ai ngu masu tawn nna, kawa hpe gaw masha ni a hka htum hta na n-gu hpe sa lagu shagun ai da.

Kawa mung kanu tsun ai hte maren, hka htum de sa nna, masha ni a n-gu hpe lagu ai da. Shingrai lagu nga yang she hka htum hta hka hpring nna kadawng danlai mat ai majaw, shangu n gaw wa malawng mat ai da. Dai shaloi htum hta shata jan asan rai htoi mat ai majaw matsan la wa gaw, “ Goi e, gadai n chye ai ngu nna lagu ai wa shata jan she mu a hka” “ga nmu yang lamu mu nga ai she rai sai” nga nna grai kaya ai hte shi lagu ai hpe tawn kau da nna, shi a hkuawn hta zaibru ni hta magawn bang la nhtawm n’ta de bai wa mat ai da oi.

N’ta de du jang madu jan kasha ni gaw n lung di sin let yup galau nga ai hpe mu jang, myit htum ai hte, n’ta chying hka lam hta zaibur ni gat a yai da nna myit lu ai maga de mi hkawm sa mat wa ai da. Madu jan kasha ni bai rawt yu ai shaloi gaw, kawa e gat a yai da ai zaibru ni gaw Ja hkyep ni rai taw nga ai hpe mu ma ai da. Shan hte a kawa hpe kade lat yu tim nwa ai majaw Ja htu let Ja n hkrun hta hkrat si mat sai kun nga sawn kau ma ai da. Rai tim kawa bai wa na hpe mung naw la nga ai da. Shannu ni mung, kawa e ru ayai tawn ai ja ni hpe magawn hta la nhtawm, panyep e kap nga ai ja hkyep ni hpe gaw nna n-gu hte galai ai pyi n-gu dang 60 lu ma ai da.

Kawa mung, myit htum myit chyum hkawm sa wa yang kahtawng langai mi na dinggai yan dingla kaw shang nga nang let ra ai galaw rai nga nga ai da. Dinggai hte dingla mung matsan la wa hpe grai shangun sha ma ai da. Hpun mung, kang 10 hta u nga yang hta rai let, ba ai lam ntsun grai shakut shaja let nga nga ai da. Dinggai yan dingla mung matsan la wa a pu ba ai nga ntsun, grai myitsu shakut shaja let, bungli lam hta kangka dik sai majaw shan a kasha shingtai hte dinghku de ya nna arau sha woi nga la sai da. Raitim matsan la wa gaw, shi hta madu jan kaba hte kasha shi lu ai lam ni hpe kachyi mung n tsun dan ai sha shi a lam hpe ip tawn da ai da.

Shingrai aten ladaw ni galai shai wa ai zawn matsan la wa gaw num kaji jan hte kasha langai hpang langai lu wa sai da oi. Raitimung, shi a lam hpe ip da ding yang sha rai lu ai da. Raitimung lani ni mi na n htoi, kasha 10 ngu na lu ai shani gaw, shi e tawn kau da ai madu jan hte kasha 10 hpe grai marit myit dum wa ai majaw, shawng na shi a dinghku a lam hpe hkrap myiprwi hte hpawn madu jan kaji hpe tsun dan ai da. Madu jan kaji mung madu wa a lam ni hpe grai na matsan dum ai majaw, “ Goi law, dai hku she nga yang gaw ndai lam ni hpe hpa majaw moi kaw nna ntsun dan nta? Matsan jam jau nga ai ma yannu ni yawg hpe an hte rau ngwi ngwi pyaw pyaw nga na matu she sa shaga la su” ngu shangun dat ai da oi.

Madu jan kaba hte kasha ni mung, shaning law law kawa hpe la yu tim n pru wa sai majaw, Ja n hkrun hta teng sha hkrat si mat sai ngu kam kau let, kahtawng ting hpe shaga nna kawa a matu kyu hpyi poi kaba galaw na nga hkyen nga ma ai da. Shingrai hpang shani na kawa a kyu hpyi poi a matu lajin nga ai shana e kawa gaw, “ manam law” ngu marawn let, nta kata de shang wa ai da. Madu jan kaba hte kasha marai shi mung kawa hpe kachyi pyi n matsing mat ai da. Raitim kawa gaw madu jan hte kasha ni hpe matsing ai da. Shing rai kawa gaw, “ daini na manam gaw laklai ai manam re majaw n’ta madu jan nan lagaw kashin ya ra ai” ngu bai tsun dat jang kasha ni gaw shan hte a kanu hpe lagaw kashin shangun ai ngu grai na pawt ma ai da.

Raitim, kanu gaw “ rai nga ai manam kaja hpe ngai nan lagaw kashin ya na n ngai” nga tsun nna manam lawa hpe lagaw kashin ya ai. Dai shaloi she manam lawa a lagaw hta lagaw chyinghkyi hkai tu ai hpe mu dat ai majaw madu wa re lam hpe kalang ta chye kau wu ai, dai majaw kasha ni hpe “ ma ni e, hkum pawt mu ndai gaw manam nre nanhte a kawa she re” ngu tsun dat ai. Kasha ni mung na kabu kajawng ai hte kawa hpe hkalum la ma ai da. Shing rai kanu gaw “ma ni e hpawt ni na poi gaw yawn hkyen ai kyu hpyi poi n rai sai, nwa hte bai hkumzup lu ai kabu kara ai poi she rai sai law” ngu tsun let madu wa hpe atsawm sha lagaw kashin ya nna hkalum la nu ai da oi. ( Maumwi gaw ndai kaw htum sai, hpu nau miwa ni gaw dai shani kaw nna, dai ni na ten du hkra tinang a n’ta hta du shang wa ai manam hpe n’ta madu jan nan lagaw kashin let hkalum la ma ai rai. )

(Raitimung, galai shai ai prat masa hta hkan nna, shara sha gu hta ngu nna ntsun ma yu ai.)